Khawvel sualna chanchin kan bihchian chuan, misual nunrawng leh rapthlak tak tak, mipui thlabar leh ralkhel taka siamtu an thahnem hle a. Chung zingah chuan USA-a California state pumpui kum tam tak chhung hlauhthawng taka siamtu, 'Golden State Killer' tia hriat lar hi a langsar zual pawl a ni ngei ang.
A hming dik tak chu Joseph James DeAngelo a ni a. Kum 1970 chho atanga 1980 chho inkar khan a vanglai hmangin, pawi lian tham tak tak - in rawk, pawngsual leh tualthahna rapthlak tak tak a thlen a. Kum 40 deuhthaw man chhuah theih lohva a awm hnuah, thiamna thar 'genetic genealogy' hmangin man chhuah a ni ta chauh a ni.
A Suahsualna Leh Hming Hrang Hrangte
DeAngelo hian hun hrang hrangah hming hrang hrang a pu a, a chhan chu a chetdan phung leh a awmna hmun a thlak kual reng vang a ni. Kum 1974 leh 1975 inkar khan Visalia khuaah in rawk leh thil ru in bul a tan a, hetah hian vawi 100 chuang in a rawk a, mipuiin 'Visalia Ransacker' (Visalia rawk hmanga) tiin an ko. Chumi hnuah Sacramento lamah insawnin, kum 1976 atanga 1979 chho khan nula, nuthianghlim leh nupa tuak thar tam tak a pawngsual a, 'East Area Rapist' tih hming a pu leh bawk.
A hnu deuhah, kum 1979 atanga 1986 chho khan pawngsual mai duh tawk lovin tualthahna hial a rawn thlen ta a. Mi 13 lai nunna a la a, chuvang chuan 'Original Night Stalker' tih hming a put phah leh bawk a ni. A hunlai chuan heng a thil tih sual hrang hrangte hi mi pakhat tih a ni ang tih police-te chuan an hre lo va. A hnu kum tam tak liam hnuah DNA hmangin mi pakhat tih vek a ni tih an finfiah ta chauh a ni.
A chetdan phung rapthlak
A thil tih dan phung chu a rapthlakin a ruahman uluk em em a. A mi bitum turte in leh a vel chu nithum vel tal a rukin a enthla hmasa thin. An hnathawh dan, an kal chhuah hun, an mut hun leh an in chhungkhur awmdan a zirchiang vek a. A chang chuan an awm loh hlanin a lut ru a, an in humhimna tur silai mu te a lo phawrh ru a, emaw tukverh kalhna te a lo hawng ru sa thin.
Zan a lo nih a, mipui an muthilh bawrh bawrh hnuah an inah chuan a lut a. A kawhmawh bawlna turte chu an mutna khumah flashlight hmangin a va chhun harh thut a. Mipa awm ve te chu hrui hmangin nghet takin a phuar a, an chungah thleng emaw no emaw a chhawp sak a. "Thleng ri a awm chuan ka that nghal ang che u" tiin a vau thin.
Chu a vaukhanna chu hmangin, hmeichhia te chu pindan dangah hruaiin nunrawng takin a pawngsual ta thin a ni. Hetiang hian pawi a khawih hnuah in chhunga thil hlu te, a bikin pawisa, thlalak leh thil tenau dangte hriatrengna atan a ru chhuak zui bawk thin.
Thlaphannain California a tuam
Kum 1970 chho tawp lam leh 1980 chho tir lam phei kha chuan California-a Sacramento leh a chhehvel mipui chu hlauhnain a tuam hneh hle a. Tuman zanah thlamuangin mut an mu ngam lo a, in kalhna tha ber ber an vuah a, ui an vulh a, dawrah chahbi leh tala lei turte a awm lo hial thin.
Mipa te chuan an mut dawnin khum bulah silai emaw tiang an inchhawp deuh vek a ni. Hmun hrang hrangah thil sual a tih avang leh, a hnu a thup thiam em avangin police-te tan a hniak chhui tur a vang em em a. Chutih hunlai chuan tun ang hian DNA test a la changkang lova, chu chuan thuneitute hna a ti har lehzual a ni.
He tualthattu rapthlak tak hi kum 30 chuang lai chu a chanchin hriat zui tur awm lovin a reh vang vang a. Mahse, thuziakmi leh chanchin hlui chhui nuam ti em em tu, Michelle McNamara chuan he thubuai hi khawvel hriatah a rawn phawrh chhuak leh a. Ani hian heng thil sual titu hrang hranga an lo ngaih hi mi pakhat vek a ni tih a ring tlat a. A lehkhabu buatsaih mek 'I'll Be Gone in the Dark' tihah chuan heng misual hi khaikhawmin 'Golden State Killer' tih hming hi a rawn hmang a. Michelle hian an man chhuah erawh hmu hman lovin a thi thung.
Police lo ni tawh thin
Joseph James DeAngelo hi a hunlai khan police officer a ni thin a. Exeter leh Auburn Police Department-ah te a thawk thin. Sorkar leh mipui thlabar taka a siam lai hian amah chu mi pangngai tak angin a nupui fanaute nen an khawsa a.
Zan lamah chuan pawisak nei lo misual ni mah se in chhung khurah chuan mi pangngai, chhungkaw pa tha tak lem changin uluk takin a inthup tlat a. Kum 1973 khan Sharon Huddle nen inneiin Citrus Heights-ah fanu pathum an nei a. A fate chuan pa tha tawpkhawk niin an sawi thin.
Kum 2018 a lo her chhuah chuan, investigator Paul Holes leh FBI te chuan beiseina thar an nei ta a. Tunhmaa Golden State Killer-in thil sual a tihna hmuna a hnutchhiah DNA sample kha la tha in, thlahtute chhuina atana mipui hman thin website 'GEDmatch' ah chuan an thehlut (upload) ta a ni.
He website-ah hian mi tu emaw, Golden State Killer nena inhnaih tak, a cousin chuan a DNA lo thehlut ve tawh a awm hlauh mai a. Chuta tang chuan chhungkaw thlah kal zel (family tree) chu chik takin an siam a. Mi sang chuang zingah rinlelh mi pahnih an nei a, chung zingah chuan Joseph James DeAngelo chu uluk taka chhui zuiin an rawn man chhuak ta a ni.
A rinlelhawm ber a nih takah chuan police-te chuan DeAngelo, kum 72 a upa tawh chu a rukin an enthla a. A car kawngkhar vawnna atang leh a bawlhhlawh bawm atanga a tissue hman hnu atangin a DNA an la ru a. Chu chu pawikhawihna hmuna DNA nen chuan a inmil ta chiah. April 24, 2018 khan police-te chuan a inah luhchhilhin an man ta a.
A thubuai an relsak
August 2020 khan he tualthattu chungthu hi tih tawp a ni ta a. Thi tura hremna a pumpelh theih nan DeAngelo chuan tualthahna thubuai 13 leh pawngsual/rukruk thubuai dang tam tak chu a tih ngei a ni tih a pawm (plead guilty) a. A thubuai tam tak, a bikin pawngsualte chu thiam loh chantir theih hun chhung, statue of limitations a liam tawh avangin a awrh thei lo bawk.
Court-ah hian a thil tihsual tuartute leh an chhungte chu dingin an tawrhna te an sawi chhuak a. Court chuan, 'parole' nei thei miah lovin damchhung lung-in tang turin a hrem ta a ni.
Golden State Killer man chhuah a nih dan hian khawvelah thiamna thar leh rorelna dik chu hun rei tak liam mah se hlen chhuah theih a la ni tih a nemnghet a. 'Genetic genealogy' thiamna hi thubuai hlui lian tham chhui nan a theih tih a tarlang a, khawvel hmun hrang hranga 'cold case' tam tak chinfel phah nan hman a ni zui ta bawk. A tuartute chhungkua leh California mipui te tan chuan kum 40 chuang an nghah rorelna dik chu a rawn thleng ta a, hlauhna ruam atangin thlamuanna an hmu ta a ni