Mexico-a mi bo zawnna chu thlalaka intih hmelthat chawpna (filters leh thlalak edit) uchuak avangin a la hlawhtling thei rih lo.
Tun thla tir khan Chiapas state-ah hmeichhe pakhat, kum 30 mi a bo a. Police-ten a bo thu thehdarhna atana a thlalak an hman leh a tak chu a inan loh em avangin bo an zawng hmu thei lo.
Mi bo, Grecia Guadalupe Orantes Mendoza hi April ni 12 zan khan Ocozocoautla de Espinosa bialah chin hriat lohvin a awm a. He nula chhungten report an thehluh hnuah, police chuan hmeichhe bo zawng tura hma lak nghalna, Alba Protocol chu an hmang nghal a.
He protocol bawhzui hian, police chuan Grecia-i bo thu tar chhuah nan a social media-a a thlalak thenkhat chu hmangin, online leh a bona bul khuaahte an thehdarh a. Buaina pakhat a awm - he nula hretute sawi danin, thlalaka mi leh a tak chu a inang lo hrim hrim a ni!
Mi bo zawnah chuan hun a hluin, dam a hmuh let leh theihna hriltu lian tak a ni a. Chuvangin mi bo thehdarhna thlalak hian pawimawhna lian tak a nei thin. Mahse, he thilah kher hi chuan tualchhung mite tan hmeichhe bo hi hriat a tiharsa zawk hlauh a ni.
“Engtin nge thlalak filter hmanga siam danglam vek chu hmangin an zawn hmuh theih ang?” tih chu social media-a an sawi zui dan a ni. Vanneihthlak takin, ni rei vak lo hnuah he nula hi Ocozocoautla leh Jiquipilas inkar kawngpuiah damin an hmu a, a bo dan hi an la chhui chiang mek.
Social media-a an lan dan ang hian a takah chuan hmuh beisei chi an ni lo tihna a ni ber e!